Müştəri Personası nədir? Necə yaratmalı?
Hədəf kütləsini tanımayan sahibkar və ya marketoloq gözü bağlı formada avtomobil idarə edən sürücüyə bənzəyir.
Xidmət və ya məhsulunuz ilə maraqlanan kütləni tanımırsınızsa, onlarla necə kommunikasiya yarada bilərsiniz? Onların nə istədiklərini bilmirsinizsə, onları necə müştərinizə çevirə bilərsiniz? Heç cür.
Hədəf kütlə personası sizə müştərilərinizi və gələcək müştərilərinizi anlamaq üçün kömək edir.
Hədəf kütlə personasını yaratmaq izləyicilərinizə hansı tip kontent, mesaj və ton ilə çıxmalı olduğunuzu bilmək, habelə müxtəlif qrupların spesifik ehtiyacları, problemləri və davranışları üçün məhsul və ya xidmətinizi inkişaf etdirmək imkanı yaradır.
Hədəf Kütlə Personası necə hazırlanır? Addım-addım izah
Addım-addım izah edirik. Əvvəlcə onu qeyd etmək lazımdır ki, nadir hallarda bizneslərin cəmi 1 müştəri personaları olur. Odur ki, əvvəlcə neçə müştəri personanızın olduğunu təyin edin. Əgər bir neçə məhsul və ya xidmət təklif etməkdəsinizsə, o zaman onlar üçün də uyğun müştəri personalarını yaratmalısınız.
Daha rahat anlamağınız üçün addımları nümunələrlə izah edəcəyik. İstənilən halda, suallarınız yaranarsa, bizə sosial media üzərindən yazaraq soruşa bilərsiniz.
Başlayaq! 🙂
Deyək ki, elektronik ev əşyaları satırıq. Məsələn, soyuducu, paltaryuyan, televizor və s. Satdığımız məhsullar premium brendlərə məxsusdur və mağazamız şəhərin elit küçələrinə yaxın ərazidə yerləşir.
Sözsüz ki, fərqli ehtiyacları olan müxtəlif qruplar üzrə müştərilərimiz ola bilər. Bəzilərini təxmin edək.
- Müxtəlif səbəblərə görə öz ev əşyalarından birini yeniləmək istəyənlər
- Yeni evlənən cütlüklər
- Yeni evlənən cütlüklərin valideynləri
- Yeni ev alanlar (ehtiyaclarında fərq hiss ediriksə, bağ evi, həyət evi və s kimi alt qruplara da bölə bilərik)
- Evini əsaslı təmir edənlər
Aralarından birini seçirik. Məsələn, yeni evlənən cütlüklərin valideynləri ilə davam edək. Əvvəlcə, davranışları analiz edirik. Bunu etməyin ən yaxşı yolu özümüzə mümkün qədər çox suallar verməkdir. Valideynlər dedikdə həm qız, həm də oğlanın valideynlərini ümumiləşdirmişik. Lakin cehizlik əşyaları qız evi aldığı üçün əsas qərar verən tərəf kimi onları seçirik. Daha sonra qızın atası və anası üçün ayrılıqda düşünməyə başlayırıq. Bəzi valideynlər bütün qərarı cütlüyə tapşırıb yalnız ödəniş hissəsində qoşulur, bəziləri isə prosesin əvvəlindən sonuna qədər iştirak edirlər. Bu davranışlar üzrə ayrı-ayrılıqda personalarımızın olması da bizim xeyrimizədir. Çünki hansı müştəri personamız ilə necə kommunikasiya yaratmalı olduğumuzu öncədən biləcəyik.
Bunu etmək çox önəmlidir. Araşdırmalardan biri göstərir ki, marketlərdə pivələri pamperslərin yaxınlığında yerləşdirmək pivə satışlarına müsbət təsir edib. Səbəb isə odur ki, yeni atalar daha çox pivə içməyə meyilli olurlar. Müştəriniz haqqında sadə bir informasiya belə gəlirlərinizi artırmağa kömək edə bilər.
Növbəti mərhələ Müştəri Personamız üçün topladığımız məlumatları vizuallaşdırmaqdır.
- Foto – Mütləq Müştəri Personanız üçün ad və foto seçin. Bəzi sahibkarlar buna ötəri yanaşsalar da, bir müddət sonra mütləq bura qayıdırlar.
Nümunəmiz üçün müştəri personamız kimi yeni ailə həyatı qurmağa hazırlaşan xanımın anasını seçək. Personamızın adı Sona xanım olsun və internetdə ona uyğun gələ biləcək hər hansı bir fotonu seçərək faylımıza əlavə edək.
Foto seçərkən müəllif hüququ olmayan vizuallar seçməyə üstünlük verin. Unsplash və ya Pexels kimi vebsaytlardan istifadə edə bilərsiniz. - Demoqrafik məlumatlar – Yaş, Yerləşmə, Ailə vəziyyəti, Təhsil səviyyəsi, Aylıq gəlir kimi məlumatları daxil edirik. Bu məlumatlar cavab tapmaq bizim üçün müştərimizin kimliyini xeyli aydınlaşdıracaq.
- Bio – Bu hissədə müştərimizin ümumi təsvirini veririk.
- Problemlər – Müştərimiz bizdən xidmət və ya məhsul əldə etməklə hansı problem(lər)ini həll edir?
- Qarşılanmalı ehtiyaclar – Müştərinin bizim məhsul və ya xidmətdən gözləntisi nədir? Bu hissədə ümumi yanaşma göstərmədiyinizdən əmin olun. Müxtəlif müştərilərin eyni məhsuldan müxtəlif gözləntiləri ola bilər. Kimsə bir avtomobili gündəlik nəqliyyat vasitəsi kimi alırsa, başqa biri eyni avtomobili sırf həftəsonları səyahətə getmək üçün ala bilər.
- Məhsuldan (xidmətdən) əldə olunan faydalar – Bu hissə bir az aldadıcı ola bilər. Bəzən məhsulu alan şəxslə istifadə edən şəxs fərqli olduqda məhsuldan alınan faydalar da dəyişir.
- Almaq üçün səbəblər – Bizdə hansı üstünlüklər var ki, müştəri həmin məhsulu və ya xidməti məhz bizdən alsın?
- Sahə üzrə təcrübəsi və biliyi – Müştərimiz bizim məhsul və ya xidməti nə qədər yaxşı tanıyır? Nə qədər araşdırır? Öncədən hansı təcrübələri var? Hansı mənbələrdən məlumat əldə edə bilər?
- Kommunikasiya kanalları – Müştərimiz ilə hansı ənənəvi və ya rəqəmsal kanallar vasitəsilə kommunikasiya yarada bilərik? Onlar haradadırlar? Hansı mövzularla maraqlanırlar? Onlara necə çataq?
Beləliklə, müştəri tiplərimizdən biri üçün persona yaratdıq. Artıq müştərimiz haqqında daha detallı anlayışımız var.
Bəs bu məlumatları harada istifadə edə bilərik?
Əmin olun ki, müştəri personalarınızı bu formada hazırlamaq sizə çox böyük zaman qazandıracaq. Artıq satış təmsilçilərinizə müştərilərinizi izah etmək, onlarda ilkin təəssüratı formalaşdırmaq daha asan olacaq.
Marketinqlə bağlı istənilən işdə isə mütləq bu faylı marketinq üzrə əməkdaşınıza və ya əməkdaşlıq etdiyiniz agentliyə təqdim edin. Bu, onların işini daha effektiv etməklə yanaşı, müəyyən test xərclərinin də qarşısını da alır, habelə aranızdakı kommunikasiyanı daha axıcı hala gətirir.
Bizimlə əməkdaşlıq etmək istəyirsiniz? Elə indi bizimlə Ödənişsiz Konsultasiya üçün uyğun vaxt seçin.