Marketinq bizneslərin inkişafı üçün kəskin dəyişikliklər yarada bilən alətdir. Əgər müştərilərinizi təyin edə, onlara çata və diqqətlərini çəkə bilmirsinizsə, bunun nəticəsi sadədir – biznesiniz çox yaşamayacaq.
Lakin bu o demək deyil ki, “qonşudan qalma geri” prinsipi ilə təsadüfi reklamlara pul xərcləməlisiniz. Marketinq addımlarınızın faydalı olması üçün həmin addımlar düşünülməli və strukturlaşdırılmalıdır, yəni marketinq planınız olmalıdır.
Bu yazıda marketinq plan nədir və necə hazırlamalı olduğunuzu sizlərlə paylaşırıq. Marketinq plan üçün ödənişsiz şablon istəyirsinizsə, yazını axıra qədər oxumağı şiddətlə tövsiyyə edirik.
Başlıqlar
Marketinq Plan nədir?
Marketinq plan seçiminizdən asılı olmaqla, rüblük və ya illik əsaslarda marketinq strategiyanızın müəyyən bir dövr üçün əsas qeydləri və xülasəsidir.
Adətən hesabat formatında hazırlanır. Həmin dövr üçün olan ümumi marketinq hədəflərinizi və hədəflərə çatmaq üçün lazımi addımları təyin edir. Marketinq planın önəmli olmasının əsas səbəblərindən biri də biznes hədəfləriniz üçün çatılan və praktiki yol xəritəsi əldə etməyinizdir.
Hesabatda addımlarınızın inkişafını və uğurunu ölçməkdə istifadə edəcəyiniz ƏPG-ni (Əsas Performans Göstəriciləri) də qeyd etməlisiniz.
Marketinq Plan və Marketinq Strategiyası
Bu mərhələdə marketinq plan ilə marketinq strategiyası arasındakı fərqləri aydınlaşdırmalıyıq.
Marketinq strategiyanız biznes strategiyasının əsasında hazırlanır və marketing addımlarınızın ali məqsədini ifadə edir: Çatmaq istədiyiniz son hədəf. Marketinq planınız isə həmin addımları necə atacağınızın detallı çertyojudur.
Bu iki anlayış biri-biri ilə qarışdırılmamalı və biri-birini əvəzləməməlidir.
Yadda saxlayın: Marketinq strategiyanız olmadan marketinq planınız ola bilməz və planınız yoxdursa, marketinq strategiyanızı həyata keçirə bilməyəcəksiniz.
Marketinq Planına niyə ehtiyac var?
Marketinq planınız olmadan heç vaxt strukturlu və öncədən düşünülmüş marketinq gedişləriniz olmayacaq. Təbii ki, hər biznes böyümək istəyir, lakin əlinizdə görülməli işlərin detallı siyahısı olmadan özünüzü yolunu itirmiş kimi hiss edəcəksiniz. Bəlkə də, artıq bu hiss sizə yad deyil: Sanki etdiyiniz heç nə fayda vermir.
Marketinq plan imkan verir ki, elə ilk gündən onlayn varlığınızı yaratmağa başlayasınız, inkişafınızı düzgün ölçəsiniz və uğurunuza təsir edən müxtəlif amilləri düzgün analiz edə biləsiniz.
Davamında brendinizin mesajını daha geniş kütləyə çatdıra, satış üçün uğurlu marketinq taktika və texnikalarınızı təyin edə bilərsiniz.
Nəzərə alın ki, marketinq büdcəniz biznesinizin ən böyük xərclərindən biri olacaq. Ona görə də, hər qəpiyin faydalı xərcləndiyini bilmək önəmlidir. Bütün xərcləri, istifadə olunacaq rəqəmsal kanalları, hədəf kütlələri və s öncədən planlaşdırmaq bunları vaxtı gəldikcə düşünməklə müqayisədə qat-qat sərfəlidir.
Marketinq Planların növləri
Marketinq planları standart yox, müxtəlifdirlər. Bu o deməkdir ki, marketinq plan hazırlayarkən təkcə ümumi yanaşma yox, kanallar, növlər, hətta individual hədəflər üzrə də planlar hazırlamaq mümkündür.
Məsələn, eyni vaxtda həm növbəti 3 ayda biznesinizin ümumi hədəfləri üçün hazırladığınız bir ümumi stratejik marketinq planınız, həm də sosial media hesablarınız üçün detallı planlarınız da ola bilər.
Biznesiniz üçün uyğun ola biləcək bir neçə marketinq planı sizə təqdim edirik.
Rüblük və ya illik marketinq plan
Əlinizdəki son dataları effektiv istifadə etmək və daha realistik hədəflər təyin etmək baxımından ən geniş yayılmış plan tiplərindən biri rüblük və ya illik (hətta 6 aylıq da mümkündür) planlardır.
Məsələn, orqanik trafikinizin son 2 ildə hər il ikiqat artdığını öyrənmiş ola bilərsiniz. Belə olan halda, orqanik trafikdə ikiqat artışı özünüzə yeni illik hədəf kimi seçmək və trendi davam etdirməyə çalışmağınızda fayda var.
Biznesinizin ölçüsü, istifadə etdiyiniz rəqəmsal kanallar və hədəflərinizdən asılı olaraq cəmi bir plana da ehtiyacınız ola bilər. Əgər marketinq yanaşmanız bir qədər kompleksdirsə, bir plan sizə çox ümumi yanaşma verə biləcək.
Rəqəmsal Marketinq Planı
Həm ənənəvi, həm də rəqəmsal marketinq alətlərindən istifadə edirsinizsə, rəqəmsal marketinq planı onlayn qərarlarınıza daha fokuslanmış yanaşma ilə köməyinizə çatacaq. Hədəflərinizə çatmaqda bir neçə onlayn kanaldan istifadə edirsinizsə, bu plan xüsusi effektiv olacaq.
Məsələn, bir tərəfdən sosial media reklamlarınızda və email marketinq addımlarınızda müəyyən bir hədəfə necə çatacağınızı planlaşdırarkən, digər tərəfdən sosial media postlarınız və orqanik kontentlə bu planı necə dəstəkləyəcəyinizi planlaşdıra bilərsiniz.
Kontent Marketinq Planı
Bu plan işlərin son dərəcə detallı hal aldığı hissədir. Burada hədəflərinizə çatmaq üçün kontent strategiyanızı necə mövqeləndirəcəyinizi təyin edirsiniz. Kontentin və kontent strategiyasının biznesiniz üçün nə dərəcədə həyati önəmə malik olduğunu sözlərlə ifadə etmək çətindir. Ciddi yanaşmaqda böyük fayda var.
Deyək ki, hədəfiniz rüb sonuna qədər spesifik bir açar sözlər üzrə ilk 10-luğa düşməkdir. Planınıza kontentinizin hazırlanma və paylaşılma addımları (mövzular, paylaşma intervalı, paylaşma kanalları, linkləmə strukturu və s) kimi hissələr daxil olacaq.
Sosial Media Marketinq Planı
Konsept sosial media üçün də eynidir. Var olmaq istədiyiniz sosial media şəbəkələrini seçirsiniz və kontenti müəyyənləşdirirsiniz.
Qeyd edək ki, sosial media marketinq üçün ayrıca strategiyanızın olması önəmlidir. Hətta “həftədə 4 dəfə saat 6 ilə 8 arasında Instagram-da post paylaşmaq” kimi bir planınız da ola bilər. Bunda səhv nəsə yoxdur, ancaq bu sizin, deyək ki, Instagram-dan gələn müştəri sayını rüblük 5% artırmaq hədəfinizə nə dərəcədə dəstək göstərir?
Tədbir üçün Marketinq plan
Xüsusilə B2B modelə fokuslanmış bizneslərin marketinq fəaliyyətində tədbirlər çox xüsusi bir elementdir.
Ona görə də tədbirlərinizin marketinq fəaliyyətini xüsusi olaraq planlaşdırmaqda böyük fayda var. Hansı tədbirlərin biznesiniz üçün daha faydalı ola biləcəyini qeyd etməyi və hər tədbirdən hansı nəticələri hədəflədiyinizi qeyd etməyi unutmayın.
Məsələn, toplamağı hədəflədiyiniz müəyyən lid (əməkdaşlığa müraciət) sayı ola bilər və ya rübün sonuna qədər satış etməyi planlaşdırdığınız bizneslər ilə görüşmək imkanınız yarana bilər. Tədbir üçün marketinq planı bu kimi hədəflərinizi təyin etməyə, onu planlaşdırmağa, atacağınız addımları müəyyənləşdirməyə və fokuslanmağa, fikrinizin heç nəyə yayınmamasına və hər şeyi tam olaraq necə edəcəyinizi bilməyinizə böyük töhvə verəcək.
Email marketinq plan
Emaillərin effektivliyi artıq heç kimə sirr deyil. Çox aşağı qiymətlər əvəzində böyük nəticələr verən emaillər ilə maksimum nəticə əldə edə bilmək üçün oradakı fəaliyyəti xüsusi diqqətlə planlaşdırın. Xoşbəxtlikdən, bu istiqamətdə milyonlarla data vardır ki, bu, kampaniyalarınızı kifayət qədər optimizə etməyə və planlaşdırmağa imkan verir.
Kampaniyalarınızın hədəflərini, onları necə seqmentləşdirdiyinizi və hədəflərə çatmaq ehtimallarınızı qeyd edin. Bu hissədə xəta payını minimuma endirmək üçün öncəki kampaniyalarınızdan qalan datalardan istifadə edə bilərsiniz.
Qarışıq Marketinq planı
Hədəflərə çatmaq üçün bir neçə kanalınızı prosesə qarışdırırsınızsa, onları ayrı-ayrı planlamaq əvəzinə qarışıq marketinq planı yazmaqda fayda var. Beləliklə, əmin olacaqsınız ki, bütün fəaliyyətlər biri-biri ilə uyğunlaşdırılıblar və fokusunuz davamlıdır.
Yeni məhsul təqdimatı üçün marketinq plan
Seçilmiş marketinq kanallarından asılı olaraq, bu plan qarışıq marketinq plana çox bənzəyir. Əsas fərq ondadır ki, burada hədəflər müddətlər üzrə (aylıq, rüblük və ya illik) deyil, xüsusi bir hadisə – məhsulun təqdimatı üzrə ölçülür.
Prinsip eyni qalır. Hələ də çatmaq istədiyiniz hədəfləriniz var. Lakin əlavə olaraq marketinq fəaliyyətlərinin məhsul komandası ilə uyğunluğunu da nəzərə alırsınız. Nəticə etibarilə, planı hazırlayarkən çevik olmalı, müəyyən fəaliyyətlərin və hədəflərin dəyişmə və ya nəzarətinizdə olmayan səbəblərdən təsirlənmə ehtimalının olduğunu bilməlisiniz.
Kiçik bizneslər üçün marketinq plan
Dünyanın müxtəlif yerlərində fəaliyyət göstərən beynəlxalq korporativlərdən fərqli olaraq kiçik bizneslərin marketinq hədəfləri qat-qat sadə olur. Ona görə də marketinq planını bənzər formada formalaşdırmağın mənası yoxdur.
Əlavə olaraq, kiçik bizneslər adətən limitli resurslara (büdcə və s) sahib olduqları üçün bu planın əsas məqsədi əsas kanallara fokuslanmaq və müraciətlər cəlb edərək biznesi böyütməkdir.
Hədəfləriniz realistik olmalıdır və əlinizdəki resurslar nəzərə alınmaqla təyin edilməlidir. Məsələn, orqanik traffik cəlb etmək üçün bloqlar paylaşmaq istəyirsiniz. Bəs bloqları yazdırmaq üçün kontent yazıçınız var? Bu xidməti almaq üçün yetərli büdcəniz var? Həmişə obyektivlərinizə necə çatacağınızı tam detallı formada qeyd etdiyinizdən əmin olun.
Marketing plan nümunələri
Yaxşı bəs marketinq planları praktikada necə görünürlər? Təsəvvür formalaşdırmaq üçün sizə iki nümunə təqdim edirik: executive summary marketing plan və one-page marketing plan.
Executive summary marketing plan, yəni icra xülasəsi marketinq planı.
One-page marketing plan, yəni bir səhifəlik marketinq plan.
İzləyicilərimizin ingilis dilində də terminləri görməyinin tərəfdarı olduğumuz üçün termini hər iki dildə göstərdik.
İcra xülasəsi marketinq planı
Əgər müxtəlif platformalarda bir neçə kampaniyanı paralel aparmağı planlaşdırırsınızsa, böyük ehtimalla marketinq planınızda bir xeyli detalı əhatə edəcəksiniz. Nəticə etibarilə, əsas hədəf və fəaliyyətləri sənədin ilk hissəsində bir neçə səhifədə qısa formada təsvir edən icra xülasəsi hazırlamaq yaxşı fikirdir.
Həm brendin ümumi stratejik obyektivlərinə uyğun bir neçə ölçüləbilən hədəfləri sıralayın, həm də hədəflənən platformaları və təyin olunmuş hədəflərə çatmaq üçün istifadə ediləcək mesajları qeyd edin.
Əlavə olaraq, fəaliyyətlərin zaman ərzində necə baş verəcəyi və istifadə edilən texnika və metodların təsirləri qeyd etməkdə də fayda var.
Bir səhifəlik marketinq plan
Necə ki icra xülasəsi ümumi marketinq planınızdakı fəaliyyət və hədəflərin ümumiləşdirilmiş formasıdır, bir səhifəlik marketinq planı onun “hər şeyi bir səhifəyə sığışdır” versiyasıdır.
Lakin, bu, o demək deyil ki, hər şey xaotik ola bilər. Yaxşı strukturlaşdırılmış plan oxucuya aşağıdakı Starbucks nümunəsindəki kimi xeyli məlumatı səliqə ilə ötürə bilər.
İcra xülasəsindəki kimi burada da ümumi marketinq strategiyası ilə uyğunluq olmalıdır, ölçüləbilən fəaliyyət və hədəflər aydın görünməlidir və hədəflərə nail olmağa təsir edəcək kanal, taktika və metriklər sıralanmalıdır.
Deməli, artıq bilirsiniz ki:
- Marketinq plan tam olaraq nədir;
- Nəyə görə önəmlidir;
- Marketinq planlarının müxtəlif növləri;
- Nəyə bənzəyirlər;
… indi isə öz planınızı yaratmağın vaxtıdır! Yazının geri qalan hissəsində marketing plan yazmağın etapları ilə tanış olacağıq.
8 Addımda Marketing Plan Yazmaq
Ümumi prosesi 8 sadə hissəyə bölə bilərik:
1. Biznesinizin hədəflərini sıralayın.
Daha öncə də dediyimiz kimi, marketinq strategiyanız birbaşa biznes strategiyanızın əsasında formalaşır. Bu o deməkdir ki, hər şeydən əvvəl biznesinizin hədəflərini aydınlaşdırma və yazıda ifadə etməlisiniz. Məsələn, biznesiniz ötən ilki gəlirlərini bu il 2 qat artırmağı hədəfləyə bilər. O zaman, marketinq strategiyanız, habelə marketing planınız həmin hədəfə nail olmağa fokuslanmış formada strukturlaşdırılacaq.
2. Həmin hədəflər üçün KPI-lar (ƏPG-ləri) təyin edin.
Qoyduğunuz hədəflərə nə dərəcədə nail olduğunuzu ölçə bilmək üçün öncədən ölçü meyarlarınızı təyin etməlisiniz. Yəni hansı Əsas Performans Göstəricilərinin (Key Performance Indicators) bu hədəfləri ölçmək üçün əsas olduğunu təyin etməlisiniz. Məsələn, əgər hədəflərinizdən biri LinkedIn-də varlığınızı genişləndirməkdirsə, izləyici sayı və ya postlarda interaktivlik nisbəti (engagement rate) kimi standart metriklərdən istifadə edə bilərsiniz.
Alternativ olaraq, daxildə öz metriklərinizi də yarada bilərsiniz. Məsələn, X böyüklüyündə şirkətlər ilə yaradılmış əlaqələrin sayı kimi.
3. Müştəri profilinizi təyin edin.
Marketing planınızda ən vacib komponentlərdən biri də kimə hədəfləndiyinizi təyin etməkdir. Ona görə də ideal müştəri profilinizi təyin etməlisiniz. Daha qəliz nümunə olan B2B modeli nümunə göstərsək, həm ölçüsü, fəaliyyət sahəsi və digər məlumatlar əsasında hədəflədiyiniz şirkətləri, həm də orada qərar verən açar şəxslərin alıcı personalarını təyin etməlisiniz.
4. Bütün (BÜTÜN) rəqiblərinizi araşdırın.
Bir çox marketinq qərarlarındakı kimi, burada da rəqiblərinizin nələr etdiklərini və onlar üçün nələrin effektiv olduğunu anlamadan qərarlar vermək heç də müdrik addım olmaz.
Qətiyyən 2-3 rəqibi araşdırıb dayanmayın. Çalışın mümkün qədər çox rəqibiniz haqqında məlumat toplayasınız və gözünüz daim onların üzərində olsun.
Onlayn və oflayn olmaqla, etik çərçivədə istənilən kanalları araşdırın və istənilən vasitələrdən istifadə etməyə çalışın. Hətta onların mağazalarına “müştəri” kimi də gedə bilərsiniz.
5. Tətbiq edilə bilən bir marketinq strategiyası formalaşdırın.
Hədəflərinizi bildikdən, onları ölçmə mexanizminizi təyin etdikdən kimi hədəfləyinizi təyin etdikdən və rəqiblərinizin nələr etdiklərini araşdırdıqdan sonra vaxt gəlib çatır öz yanaşmanızı təyin etməyə. Aşağıdakıları nəzərə alın və aydın formada yazın:
- Hansı kanal və platformaları hədəfləyəcəksiniz (Məsələn, LinkedIn, Google Ads, sektora spesifik forumlar, sektora spesifik jurnallarda varlıq).
- Qısa dövrdə əsas strategiyalarınız və yanaşmalarınız nələr olacaq (“ABC” konfransında iştirak etmək, sosial reklamların həcmini artırmaq, “X” açar sözü üçün Google-da ilk səhifəyə düşmək).
- Hansı taktika və texnikaları istifadə edəcəksiniz (Tədbirlərdə paylamaq üçün broşur və ya vizit kartları çap etmək, “Y” mövzusunda 5 bloq yazısı dərc etmək).
- Dəyər təklifiniz nədir (yəni sizi rəqiblərinizdən fərqləndirən nədir).
6. Marketinq büdcənizi təyin edin.
Marketinq büdcəsi qəbul edəcəyiniz fəaliyyətlər və strategiyaların seçilməsində fundamental rol oynayır. Yəqin ki, bu hissəyə qədər xərclərinizin təxmini həcmi haqqında nəsə düşünmüsünüz. Büdcənizi detallı planlaşdırmaq vacibdir. Nəyə və nə qədər xərcləyəcəyinizi aydın qeyd edin.
7. Bütün komanda üzvlərinizi və onların öhdəliklərini qeyd edin.
Marketing planınızın müxtəlif hissələri müxtəlif əməkdaşlar tərəfindən həyata keçiriləcək. Ona görə də hər kəsin öhdəlikləri onların son təhvil vaxtı və uğur göstəriciləri ilə birlikdə əlavə edilməlidir.
Məsələn, ölçdüyünüz göstəricilərdən biri sosial mediada böyümə həcminizdirsə, bu sosial media menecerinizin öhdəliyi ola bilər. Paralel olaraq, kontentləri yazmaq kopirayterinizin, Google reklamlarını yerləşdirmək rəqəmsal marketinq mütəxəssisinizin öhdəliyi ola bilər. Hamının planı icra etmək vaxtı gəlib çatdıqda nə edəcəklərini bildiklərini dəqiqləşdirin.
8. İzləmə və hesabat qaydaları təyin edin.
İnkişafı ölçmək üçün hesabat dövrlərini (məsələn, günlük, həftəlik, aylıq və ya rüblük) və formasını qeyd etmək lazımdır. Məsələn, əsas hissədarlar ilə həftəlik birəbir görüşlərinizi təyin edə bilərsiniz.
Göndərdiyiniz hesabatlarda təlimatları da əlavə etdiyinizi və onların strukturlu olduğunu mütləq yoxlayın.
Artıq sənəddə nələri əhatə edəcəyinizi bilirsiniz. Bəs onu hansı formada tərtib edəcəksiniz?
Marketing plan strukturu
Sənədiniz aşağıdakı hissələrdən ibarət olacaq:
- İcra xülasəsi (Executive summary). Daha öncə də qeyd etdiyimiz kimi, bu, sənədin əvvəlində edəcəyiniz hər şey haqqında ümumi məlumat verən 2 səhifəlik bir xülasədir.
- Biznes haqqında məlumat. Konteksti izah edə bilmək üçün brendiniz haqqında müəyyən açar məqamları qeyd etməlisiniz. Bura kim olduğunuz, missiya bəyanatı (mission statement), ümumi biznes hədəflərinizi və s qeyd edə bilərsiniz.
- Hədəfləriniz. Marketinq hədəflərinizə icra xülasəsində artıq toxunmuş olacaqsınız. Bu hissədə onları daha detallı formada qeyd edirsiniz. Bu SMART hədəfləri niyə təyin etmisiniz? Onlar biznesin məqsədləri ilə üst-üstə düşür?
- Rəqabət analizi. Bu bölmədə rəqabət analizinizdən əldə etdiyiniz əsas məqamları vurğulayın. Əsas etibarilə, rəqiblərinizin uğur əldə etdikləri kanalları, traffik cəlb etdikləri əsas mənbələri, ulduz səhifələrini və istifadə etdikləri reklam növlərini qeyd edin.
- SWOT analizi. Marketinq planınızın tərkibində biznesin SWOT analizini də hazırlamaq lazımdır. Bu, sizə öz güclü və zəif cəhətlərinizi, habelə şirkət xaricindəki fürsət və təhdidləri anlamağınıza çox dəstək olacaq. Beləliklə, öz marketinq planınızı daha effektiv və məlumatlı formada hazırlaya bilərsiniz.
- Hədəf bazarın icmalı. Öz məqsəd və performansınızı dəqiq anlaya bilmək üçün hədəflədiyiniz bazar haqqında ümumi anlayışınız olmalıdır.
Bunun üçün Statista kimi mənbələrdən istifadə edə bilərsiniz. Bu kimi mənbələr sizə trendlər, böyümə tempi, bazar həcmi, inkişafda olan regionlar və s kimi önəmli məlumatlar verə bilər. - Müştərinin Səyahət Xəritəsi. İngilis dilində – Customer Journey Map (CJM). Daha yaxşı hədəfləmə və daha effektiv müraciətlər (lidlər) üçün mütləq müştəri tərəfdə ümumi prosesin necə baş verdiyini anlamalısınız.
Müştəriniz sizinki kimi bir məhsulu və ya xidməti alarkən nələr edir? Səyahətinin müxtəlif etaplarında hansı kanallardan və ya məkanlardan istifadə edir? Onunla yollarınızı harada kəsişdirə bilərsiniz? - Unikal Satış Təklifi. İngilis dilində – Unique Selling Proposition (USP). Şirkətinizi digərlərindən nəyin fərqləndirdiyini mütləq təyin etməlisiniz. Əksər kontentinizdə və satış materiallarınızda buna arxalanacaqsınız.
- Brendinq. Bu bölmədə brendinizin hazırda necə başa düşüldüyünü (PREM Agency dedikdə insanların ağlına necə bir agentlik gəlir?) müəyyənləşdirirsiniz. Varsa, bu hissə üçün PR və reputasiya meneceriniz ilə məsləhətləşin.
Unutmayın ki, bu sualın cavabı siz tərəfdən verilməməlidir. Brendinq sizin öz biznesiniz haqqında düşündükləriniz deyil, hədəf kütlənizin bu biznesiniz haqqında düşündükləridir.
Bundan əlavə, brendini haqqında necə düşünülməsini istədiyinizi də qeyd edə bilərsiniz. Xüsusilə də hədəfləriniz arasında mövcud hansısa fikirləri dəyişmək var isə. - Marketinq kanalları. Hədəfləmək istədiyiniz bütün marketinq kanallarını qeyd etdiyiniz hissə isə buradır. Var olmaq istədiyiniz bütün platformaları sıralayın. Hər birinin qarşısında onun ümumi məqsədiniz ilə nə cür uyğunluq təşkil etdiyini əlavə edin.
- Metriklər və ƏPG-ləri. Müzakirə etdiyimiz kimi, planın nəticəsinin uğurlu olub-olmamasını ölçmək üçün onu necə ölçəcəyinizi aydınlaşdırmalısınız. Bu bölmə bunu hansı metriklər və göstəricilər əsasında ölçəcəyinizi izah etdiyiniz hissədir.
- Marketinq strategiyası və taktikalar. Daha öncə də dediyimiz kimi, tətbiq edəcəyimiz taktika və metodları qeyd edəcəyimiz hissə buradır.
- Yekun. Marketinq planınız özlüyündə bir hesabat olduğuna görə onun da sonda yekunu olmalıdır. Bu bölməni istənilən əlavə məlumatları və s yazmaq üçün istifadə edin.
Ödənişsiz Marketinq Plan Şablonu
Bu qədər məlumatdan sonra bəlkə də bütün bunların çox çətin olduğunu və ya kifayət qədər vaxtınızın olmadığını düşünürsünüz.
Elə bunu düşünərək sizin üçün öz dilimizdə marketinq plan şablonunu da hazırladıq. Əlbəttə ki, ödənişsiz 🙂
Əldə etmək üçün aşağıdakı formu doldurmağınız kifayətdir.
Ümid edirik ki, sizə faydamız toxundu. Hər kəsə uğurlar!
Sual və ya təkliflər üçün bizə yazmaq istəyirsinizsə, bura klikləmək kifayətdir.